15 مئی 2026 : وسطی و جنوبی پنجاب میں خطرناک گرج چمک کے ساتھ ، گرد آلود طوفان، ملتان 111 کلومیٹر ، رحیم یار خان 102 کلو میٹر فی گھنٹہ کی شدید آندھی، ژالہ باری اور آسمانی بجلی سے املاک کو نقصان

ملک کے مختلف علاقوں میں مغربی ہواؤں کے زیرِ اثر وقفے وقفے سے گرج چمک کے طوفان، تیز آندھی، بارش اور چند مقامات پر ژالہ باری کا سلسلہ دوسرے روز  بھی  جاری رہا۔ خصوصاً جنوبی پنجاب میں شدید گرد آلود  آندھیوں اور گرج چمک نے معمولاتِ زندگی متاثر کر دیئے جبکہ مختلف علاقوں میں آسمانی بجلی گرنے، تیز ہواؤں اور ژالہ باری کے باعث جانی و مالی نقصان کی اطلاعات موصول ہوئیں۔ 🌩️🌪️

ہمارے مقامی و نجی موسمیاتی اسٹیشنز کے مطابق ضلع رحیم یار خان کے بلال فارمز میں 102 کلومیٹر فی گھنٹہ تک طوفانی ہوائیں ریکارڈ کی گئیں، جبکہ محکمہ موسمیات کے مطابق ملتان ائیرپورٹ پر 111 کلومیٹر فی گھنٹہ تک شدید جھکڑ ریکارڈ ہوئے۔ بہاولپور ائیرپورٹ اور لاہور ائیرپورٹ پر بھی 59 کلومیٹر فی گھنٹہ تک تیز ہوائیں چلیں۔ جنوبی پنجاب کے مختلف علاقوں میں گرد آلود آندھی کے باعث حدِ نگاہ متاثر ہوئی جبکہ کئی مقامات پر بجلی کی فراہمی معطل رہی۔ 💨⚡

شدید آندھی اور گرج چمک کے باعث ملتان، رحیم یار خان، بھکر، فیصل آباد، چنیوٹ،  بہاولپور، ڈیرہ غازی خان اور گردونواح میں متعدد درخت، دیواریں، سولر پینلز اور بجلی کے کھمبے گرنے کی اطلاعات موصول ہوئیں۔ بعض علاقوں میں آسمانی بجلی گرنے کے واقعات بھی پیش آئے جبکہ ژالہ باری سے فصلوں کو نقصان پہنچنے کی اطلاعات سامنے آئیں۔ 🚨🌾

محکمہ موسمیات کے مطابق پنجاب میں فورٹ منرو میں 34 ملی میٹر، جہلم میں 13، ڈیرہ غازی خان شہر میں 10، لاہور شہر میں 8 جبکہ فیصل آباد میں 6 ملی میٹر بارش ریکارڈ کی گئی۔ خیبرپختونخوا میں کاکول میں 15، بالاکوٹ اور پتن میں 8، اپر دیر میں 6 جبکہ پاڑاچنار میں 3 ملی میٹر بارش ہوئی۔ آزاد کشمیر میں راولاکوٹ میں 9، کوٹلی میں 5 جبکہ مظفرآباد ائیرپورٹ پر 4 ملی میٹر بارش ریکارڈ کی گئی۔ 🌧️⛰️

محکمہ موسمیات  کے مطابق  ملک کے مختلف علاقوں میں کتنی بارش اور آندھی ریکارڈ ہوئی ، تفصیلات جانئیے