23 جولائی 2026 :لاہور ائیرپورٹ پر 252 ملی میٹر ریکارڈ بارش، شمال مشرقی و وسطی پنجاب میں مون سون نے سیلابی صورتحال پیدا کر دی

ملک میں مون سون کا طاقتور سلسلہ بدستور پوری شدت سے اثر انداز ہو رہا ہے، جس کا مرکز اس وقت وسطی اور شمال مشرقی پنجاب ہے، جبکہ اس کے اثرات بالائی خیبرپختونخوا، آزاد کشمیر اور شمالی علاقوں تک بھی پھیلے ہوئے ہیں۔ گزشتہ 24 گھنٹوں کے دوران  موسلادھار بارشوں کے باعث  لاہور، گوجرانوالہ، سیالکوٹ، قصور، نارووال کے شہری علاقوں میں سیلابی کی صورتحال پیدا ہوئی، متعدد سڑکیں اور نشیبی علاقے زیرِ آب آگئے جبکہ کئی مقامات پر آمدورفت شدید متاثر رہی۔ مسلسل بارشوں کے باعث دریاؤں اور مقامی ندی نالوں میں پانی کی سطح تیزی سے بلند ہو رہی ہے اور مختلف علاقوں میں سیلابی صورتحال برقرار ہے۔ سیلابی پانی کھیتوں میں داخل ہونے کی بھی اطلاعات ہیں۔

محکمہ موسمیات (PMD) کے مطابق گزشتہ 24 گھنٹوں کے دوران سب سے زیادہ بارش لاہور ائیرپورٹ پر 252 ملی میٹر ریکارڈ کی گئی، جبکہ سیالکوٹ ائیرپورٹ پر 91 ملی میٹر، لاہور شہر اور نارووال میں 84، 84 ملی میٹر ریکارڈ ہوئی۔ اس کے علاوہ پنجاب، خیبرپختونخوا، سندھ، بلوچستان اور گلگت بلتستان کے متعدد علاقوں میں بھی گرج چمک کے ساتھ بارش کا سلسلہ جاری رہا۔
محکمہ موسمیات کی رصد گاہوں پر گزشتہ 24 گھنٹے میں ریکارڈ بارش کی مقدار ذیل کی فہرست سے جانئیے۔

موسم کا حال کے مقامی و نجی موسمیاتی اسٹیشنز   اور رین گیجز  کے مطابق سب سے زیادہ بارش لاہور کینٹ میں 227 ملی میٹر ریکارڈ کی گئی، جبکہ جوہر ٹاؤن، لاہور میں 151 ملی میٹر اور سیالکوٹ (چٹی شیخاں) میں 93 ملی میٹر بارش ہوئی۔ علاوہ ازیں مرید (چکوال) میں 58 ملی میٹر، گوجرانوالہ، راولپنڈی، اسلام آباد، اٹک، مردان، قصور اور دیگر علاقوں میں بھی بارش ریکارڈ کی گئی۔

ہمارے رین گیج نیٹ ورک کے مطابق سب سے زیادہ بارش ڈی ایچ اے (ای ایم ای)، لاہور میں 189 ملی میٹر ریکارڈ کی گئی، جبکہ کھیوڑہ میں 140 ملی میٹر اور سیٹلائٹ ٹاؤن، گوجرانوالہ میں 69 ملی میٹر بارش ہوئی۔ یہ بارش اس بات کی نشاندہی کرتی ہے کہ مون سون کا موجودہ اسپیل وسطی پنجاب میں غیر معمولی شدت اختیار کیے ہوئے ہے۔
ہمارے مقامی و علاقائی اسٹیشنز اور  رین گیجز  پر  24 گھنٹوں میں ریکارڈ بارش کی تفصیل ذیل میں موجود ہے۔