22 جولائی 2026 :گوجرانوالہ 142 ملی میٹر، منڈی بہاؤالدین میں 138 اور نارووال میں 117 ملی میٹر کی ریکارڈ بارش

ملک کے بالائی اور وسطی علاقوں میں گزشتہ 24 گھنٹوں کے دوران بھی  مون سون کی بارشوں کا سلسلہ وقفے وقفے سے  جاری رہا، جس کے باعث خصوصاً وسطی پنجاب، شمال مشرقی پنجاب، خیبر پختونخوا اور آزاد کشمیر کے متعدد علاقوں میں موسلادھار بارش ریکارڈ کی گئی۔  شدید بارشوں کی وجہ سے  خیبر پختونخوا میں سیلابی ریلوں نے تباہی مچا دی ،  کئی رابطہ سڑکیں  اور پل ٹوٹ  گئے، ٹریفک کی روانی متاثر ہونے سے مسافر کئی گھنٹوں تک پھنسے رہے، سیلابی ریلے کئی مکانات اور دکانوں کو بہا لے گئے۔اسی طرح پنجاب میں نشیبی علاقوں میں پانی جمع ہونے سے ٹریفک کی روانی متاثر ہونے کے ساتھ ساتھ برساتی پانی گھروں و دکانوں  میں داخل ہونے  کی اطلاعات بھی موصول ہوئیں۔

محکمہ موسمیات (PMD) کے مطابق گزشتہ 24 گھنٹوں کے دوران سب سے زیادہ بارش گوجرانوالہ میں 142 ملی میٹر ریکارڈ کی گئی، جبکہ منڈی بہاؤالدین میں 138 ملی میٹر اور نارووال میں 117 ملی میٹر بارش ہوئی۔ اس کے علاوہ سیالکوٹ ائیرپورٹ پر 95 ملی میٹر، حافظ آباد میں 85 ملی میٹر، چکوال میں 70 ملی میٹر، برنالہ (آزاد کشمیر) اور مالم جبہ میں 65، 64 ملی میٹر، اوکاڑہ میں 64 ملی میٹر، چیراٹ میں 55 ملی میٹر، گجرات میں 49 ملی میٹر، گڑھی دوپٹہ اور سیالکوٹ کینٹ میں 44، 44 ملی میٹر جبکہ کالام، جھنگ، ژوب اور جہلم سمیت کئی دیگر علاقوں میں بھی اچھی بارش ریکارڈ کی گئی۔

 پنجاب اور خیبرپختونخوا میں حالیہ بارشوں کے باعث چھتیں، دیواریں گرنے اور سیلابی ریلوں کے باعث بڑے پیمانے پر جانی و مالی نقصان ہوا ہے، پرنٹ میڈیا کے مطابق اب تک مختلف حادثات کے نتیجے میں 23 افراد جاں بحق جبکہ درجنوں زخمی ہوچکے ہیں۔

محکمہ موسمیات کی رصدگاہوں پر صبح 8 بجے تک ریکارڈ کی گئی گزشتہ 24 گھنٹوں کی بارش کی تفصیل ذیل میں درج ہے۔