17 اگست 2026 : اسلام آباد اور راولپنڈی میں موسلادھار بارش، اسلام آباد زون 1 میں 171 ملی میٹر بارش ریکارڈ ۔ نالہ لئی میں طغیانی کا خطرہ

 گزشتہ 24 گھنٹوں کے دوران اسلام آباد، راولپنڈی، شمالی پنجاب، کشمیر اور بالائی خیبر پختونخوا میں گرج چمک کے ساتھ بارش ہوئی۔ اسلام آباد کے مغربی علاقوں، بالخصوص مارگلہ پہاڑیوں سے متصل مقامات  جس میں زون 1 کے علاقے، ڈی 12، ڈی 17، جی 13  ، ای 11 اور  گولڑہ وغیرہ شامل  ہیں اور  راولپنڈی کے مختلف علاقوں جیسے پیر ودھائی، گولمنڈی، چکلالہ، میں بارش کا زور زیادہ رہا۔

موسم کا حال کے مقامی و نجی موسمیاتی اسٹیشنز کے مطابق سب سے زیادہ بارش سیکٹر F-10/2، اسلام آباد میں 171 ملی میٹر ریکارڈ کی گئی، جبکہ راولپنڈی ویسٹریج میں 140 ملی میٹر اور چکلالہ اسکیم 3، راولپنڈی میں 100 ملی میٹر بارش ہوئی۔ اس دوران ویسٹرج میں کلاوڈ برسٹ جیسی بارش بھی ریکارڈ ہوئی ،جہاں  300 ملی میٹر فی گھنٹہ تک بھی بارش کا دورانیہ ریکارڈ کیا گیا۔

جڑواں شہروں میں تیز ہوائیں بھی ریکارڈ ہوئیں، جن میں بحریہ ٹاؤن فیز 2، راولپنڈی میں 75 کلومیٹر فی گھنٹہ کی آندھی کے ساتھ 35 ملی میٹر  بارش ، گلشن آباد میں 65 کلومیٹر فی گھنٹہ  آندھی کے ساتھ 36  ملی میٹر بارش اور چکلالہ اسکیم 3 میں 57 کلومیٹر فی گھنٹہ کی تیز ہوا شامل ہے۔

موسلادھار بارش کے باعث جڑواں شہروں کے نشیبی علاقوں میں پانی جمع ہونے کے ساتھ نالہ لئی میں بھی پانی کی سطح تیزی سے بلند ہوئی۔ ضلعی انتظامیہ کے مطابق کٹاریاں کے مقام پر پانی کی سطح 20 فٹ تک پہنچ گئی، جبکہ گوالمنڈی پل کے مقام پر پانی کا بہاؤ 17 فٹ ریکارڈ کیا گیا ۔ نالہ لئی کے اطراف خطرے کے سائرن بجا دیے گئے ہیں اور کناروں پر آباد افراد کو فوری علاقہ خالی کرنے کی ہدایت کی گئی ہے۔ ڈھوک کھبہ اور صادق آباد میں پانی گھروں میں داخل ہونے کی اطلاعات بھی موصول ہوئیں ہیں۔

ہماری رین گیجز اور مقامی و علاقائی اسٹیشنز پر ریکارڈ بارش و ہوا کی رفتار ذیل کی فہرست سے دیکھی جا سکتی ہے۔

محکمہ موسمیات کے مطابق گزشتہ 24 گھنٹوں کے دوران صبح  8  بجے تک  اسلام آباد  گولڑہ میں 145 ملی میٹر  بارش ریکارڈ کی گئی، جبکہ راولپنڈی پیرودھائی میں 107 ملی میٹر اور منگلا میں 88.4  ملی میٹر بارش ریکارڈ  ہوئی۔ اس کے علاوہ راولپنڈی چکلالہ، نیو کٹاریاں، کچہری، شمس آباد، گجرات، جہلم، مری، سیالکوٹ اور کشمیر کے مختلف علاقوں میں بھی بارش ریکارڈ کی گئی۔ خیبر پختونخوا کے بالائی اور پہاڑی علاقوں میں بھی بارش کا سلسلہ جاری رہا، جہاں مالم جبہ، کاکول اور بالاکوٹ میں بارش ہوئی۔

مسلسل بارش کے باعث خیبر پختونخوا کے پہاڑی علاقوں، گلگت بلتستان، مری، گلیات اور کشمیر میں لینڈ سلائیڈنگ کا امکان ہے۔سفر کے دوران احتیاط لازم ہے۔
محکمہ موسمیات کی رصد گاہوں پر ریکارڈ کی گئی بارش کی تفصیل ذیل میں دی گئی فہرست سے جانئیے۔