26 جولائی 2026 :دو روزہ رپورٹ : مون سون کی غیر معمولی بارشوں سے ملک میں بیشتر مقامات پر سیلابی صورتحال، مختلف واقعات میں 19 افراد جاں بحق ، متعدد زخمی۔

گزشتہ دو روز کے دوران مون سون کا طاقتور سلسلہ بالخصوص وسطی اور شمال مشرقی پنجاب پر سب سے زیادہ اثر انداز رہا، جبکہ خیبرپختونخوا، آزاد کشمیر، گلگت بلتستان، بلوچستان اور سندھ کے بعض علاقوں میں بھی موسلادھار بارشیں ریکارڈ کی گئیں۔ شدید بارشوں کے باعث لاہور،گجرات سرگودھا، وزیرآباد ، گوجرانوالہ، سیالکوٹ، نارووال اور دیگر شہروں میں اربن فلڈنگ کی صورتحال پیدا ہوئی، جبکہ پہاڑی علاقوں میں لینڈ سلائیڈنگ، برساتی ندی نالوں میں طغیانی اور متعدد شاہراہوں کی بندش کے واقعات رپورٹ ہوئے۔ ڈیرہ غازی خان،  مانسہرہ، جنوبی وزیرستان، استور اور بلتستان کے مختلف علاقوں میں سیلابی ریلوں سے سڑکیں، پل اور رابطہ راستے متاثر ہوئے جبکہ کئی مقامات پر کھیتوں اور آبادیوں میں پانی داخل ہونے سے جانی و مالی نقصان بھی ہوا۔ دوسری طرف  سندھ اور تھر پارکر  کے مختلف اضلاع  میں بھی بادل جم کر برسے جس سے تھر کی پیاسی زمین سریاب ہوئی، لوگوں نے سکھ کا سانس لیا۔ 

محکمہ موسمیات (PMD) کے مطابق گزشتہ دو روز کے دوران سب سے زیادہ بارش لاہور ائیرپورٹ پر 252 ملی میٹر ریکارڈ کی گئی، جبکہ گوجرانوالہ میں 142 ملی میٹر، منڈی بہاؤالدین میں 138 ملی میٹر، نارووال میں 117 ملی میٹر اور سیالکوٹ ائیرپورٹ پر 95 ملی میٹر بارش ہوئی۔ موسم کا حال کے مقامی موسمی اسٹیشنز اور رین گیج نیٹ ورک پر بھی غیر معمولی بارش ریکارڈ کی گئی، جہاں لاہور کینٹ میں 227 ملی میٹر، ڈی ایچ اے (ای ایم ای) لاہور میں 189 ملی میٹر، جوہر ٹاؤن لاہور میں 151 ملی میٹر اور کھیوڑہ میں 140 ملی میٹر بارش ریکارڈ ہوئی، جو اس مون سون اسپیل کی شدت کو ظاہر کرتی ہے۔

موسم کا حال کے مقامی و علاقائی اسٹیشنز اور رین گیجز پر ریکارڈ بارش کی مقدار ذیل کی فہرست سے جانئیے۔

شدید بارشوں کے نتیجے میں ملک بھر میں چھتیں گرنے، کرنٹ لگنے اور سیلابی حادثات میں گزشتہ دو روز کے دوران 19 افراد جاں بحق ہوگئے، جبکہ 26 جون سے اب تک مون سون بارشوں سے مجموعی اموات 97 تک پہنچ چکی ہیں۔ دوسری جانب دریائے چناب میں ہیڈ قادر آباد پر اونچے درجے، دریائے راوی میں ہیڈ بلوکی پر درمیانے درجے جبکہ دریائے کابل، دریائے سندھ اور بلوچستان کے دریائے لہڑی میں مختلف درجوں کا سیلاب برقرار ہے۔ متعلقہ ادارے متاثرہ علاقوں میں امدادی سرگرمیوں میں مصروف ہیں، جبکہ مسلسل بارشوں کے باعث نشیبی علاقوں اور دریاؤں کے کنارے آباد آبادیوں کو بدستور محتاط رہنے کی ہدایت کی گئی ہے۔