8 اپریل 2026 : ملک بھر میں طوفانی بارشیں ، مہمند میں 151 ملی میٹر بارش، بسالی ،راولپنڈی میں 71 کلومیٹر فی گھنٹہ کی آندھی، فصلیں اور شہری نطام متاثر، پہاڑی علاقوں میں لینڈ سلائیڈنگ

حالیہ طاقتور موسمی نظام کے زیرِ اثر ملک کے مختلف حصوں میں نمایاں بارش ریکارڈ کی گئی، جس کی تفصیلات مقامی رین گیجز، پمقامی و علاقائی موسمی اسٹییشنز  اور دیگر ذرائع سے موصول ہوئیں۔ خاص طور پر شمالی پنجاب اور خیبر پختونخوا میں بارش کی شدت زیادہ رہی، جہاں متعدد علاقوں میں 50 ملی میٹر سے زائد بارش نوٹ کی گئی۔

اعداد و شمار کے مطابق سب سے زیادہ بارش خیبر پختونخوا کے ضلع مہمند کے علاقے پرتہ کلی میں 151 ملی میٹر ریکارڈ کی گئی، جو اس سلسلے کی شدت کو ظاہر کرتی ہے۔ بارش کی وجہ سے مقامی ندی نالے بپھر گئے، سیلابی ریلوں نے نطام زندگی کو کو بری طرح متاثر کیا۔ ضلع مامد گٹ میں 96 ملی میٹر جبکہ اٹک اور اس کے گردونواح، خصوصاً پنڈی گھیب کے علاقوں میں 80 ملی میٹر سے زائد بارش رپورٹ ہوئی۔ راولپنڈی اور اسلام آباد کے مختلف علاقوں میں بھی 50 سے 75 ملی میٹر تک بارش ریکارڈ کی گئی،

مسلسل بارشوں کے نتیجے میں نشیبی علاقوں میں پانی کھڑا ہو گیا اور نکاسی آب کے مسائل سامنے آئے، جس سے شہری زندگی متاثر ہوئی۔ اس کے ساتھ ساتھ پنجاب اور خیبر پختونخوا کے مختلف علاقوں میں شدید ژالہ باری بھی دیکھنے میں آئی، جس نے زرعی شعبے کو خاص طور پر متاثر کیا۔ جنوبی پنجاب کے اضلاع، جن میں تونسہ، صادق آباد، ملتان، بھکر اور لیہ شامل ہیں، شدید ژالہ باری کی لپیٹ میں آئے، جبکہ لاہور، فیصل آباد، سرگودھا اور چنیوٹ کے بعض علاقوں میں بھی اولے پڑے، ژالہ باری اور تیز ہواؤں کے باعث گندم، مکئی، جَو اور تربوز ، آم کے باغات سمیت دیگر پھلوں کے باغات بھی متاثر ہوئے۔ کئی علاقوں میں سولر پینلز اور فائبر کی چھتیں بھی متاثر ہوئیں، جو اس موسمی نظام کی شدت کا واضح ثبوت ہے۔

ہمارے مقامی و علاقائی موسمی اسٹیشنز و رین گیجز پر پچھلے 24 گھنٹوں میں ریکارڈکی گئی بارش کی مقدار  اور ہواؤں کی رفتار ذیل کی فہرست سے جانئیے

طاقتور گرج چمک کے طوفان کوہ سیلمان کے پہاڑوں پر تشکیل پائے ، بعد ازاں ملک کے بالائی اور وسطی علاقوں کی جانب بڑھا۔ گرج چمک کے اس شدید نطام کی وجہ سے آسمانی بجلی گرنے کےکئی واقعات رونما ہوئے۔ جس سے انسانی جانوں کے ساتھ املاک کے نقصان کی بھی اطلاعات موصول ہوئیں۔تیز ہواؤں اور  آندھی، گرج چمک اور ژالہ باری کے ساتھ موسلا دھار بارش نے مختلف علاقوں میں معمولات زندگی کو متاثر کیا۔

خیبر پختونخوا اور آزاد کشمیر میں مسلسل بارشوں کے باعث لینڈ سلائیڈنگ کے متعدد واقعات رپورٹ ہوئے، جن میں گلیات کا علاقہ سب سے زیادہ متاثر ہوا۔ یہاں کئی مکانات یا تو مکمل طور پر تباہ ہو گئے یا ان میں دراڑیں پڑ گئیں، جس سے مقامی آبادی کو شدید مشکلات کا سامنا کرنا پڑا۔ پہاڑی علاقوں میں مٹی کے تودے گرنے سے سڑکیں بھی متاثر ہوئیں اور آمد و رفت میں رکاوٹ پیدا ہوئی۔

دریائے کابل میں نچلے درجے کا سیلاب کی صورتحال دیکھی گئی، جبکہ ندی نالے اور چھوٹے دریا بھی بھرنے کے قریب پہنچ گئے۔ نشیبی اور ڈاؤن اسٹریم علاقوں میں پانی کھڑا ہونے سے مقامی آبادی کو مشکلات کا سامنا کرنا پڑا اور کئی علاقوں میں عارضی سیلابی کیفیت پیدا ہو گئی۔

دوسری جانب بالائی پہاڑی علاقوں میں درجہ حرارت میں نمایاں کمی کے باعث برفباری بھی ریکارڈ کی گئی۔ لواری ٹنل ، بابو سر پاس پر برفباری ہوئی ، ضلع مانسہرہ میں  ناران اور ملحقہ علاقوں میں پانی کے چشمے جم گئے، جو اس سلسلے کی غیر معمولی نوعیت کو ظاہر کرتا ہے۔ یہ صورتحال اپریل کے مہینے میں غیر متوقع سمجھی جا رہی ہے۔جس سے درجہ حرارت میں بھی نمایاں کمی دیکھنے میں آئی۔

 جنوبی پنجاب میں ہونے والی ژالہ باری  ایک غیر معمولی یا تاریخی واقعہ ہے، جہاں تیز ہواؤں اور بڑے سائز کے اولوں نے فصلوں کو شدید نقصان پہنچایا۔ محکمہ موسمیات نے سب سے زیادہ تیز ہوائیں ملتان اور سیالکوٹ ائرپورٹ پر 56 کلو میٹر فی گھنٹہ کی ریکارڈ کیں۔جبکہ منڈی بہاوالدین میں بھی 37 کلو میٹر فی  گھنٹہ کی ہوا چلی۔

مجموعی طور پر یہ موسمی نظام بارش، ژالہ باری، تیز ہواؤں، لینڈ سلائیڈنگ اور سیلابی صورتحال کا ایک پیچیدہ امتزاج ثابت ہوا، جس نے نہ صرف شہری  بلکہ زرعی معیشت اور پہاڑی علاقوں کی زندگی کو بھی بری طرح متاثر کیا۔

محکمہ موسمیات کے مطابق انکی رصد گاہوں پر 24 گھنٹوں میں ریکارڈ کی گئی بارش کی مقدار ذیل کی فہرست سے جانئیے۔